Di liebi Inspiration…

Wenn ich än kreative Ahstupser bruchä

S’Johr 2020 liegt hinder üs und eigentli hani doh wölle uf di letschtä 366 Täg zrugg luegä. Aber ganz ehrlich, irgendwie isch bi mir doh däfür momentan äs bitzeli d’Luft dusse!

Verstönd mi bitte nöd falsch, i han das Johr (trotz Corona) än Hufe wunderbari Menschä dörfe kennälärne und vor dä Kamera ha. Han die Begägnige sehr g’nosse, han tolli Stückli vo Läbensgschichte dörfe begleitä… und bin, meh als eimol, so uhsinnig inspiriert vome Shooting zrugg cho, dass ich’s chum han chöne erwarte, mir d’Bilder endlich uf dä PC z’lade und die bsunderä Momentufnahme dürez’gügsle!
Das Gfühl, die unbändig Freud, wenn’s mir glingt, än chliine, oder grosse Mensch, äs Paar, oder ä Familie i ihrem einzigartige Wesä ihz’fange, isch soooo wertvoll für mi! Und di liebä Rückmäldige, wo mich erreichäd, rüehred mi jedäsmol uf’s Neue & freuäd mi vo Härze.

Aber äs hät üs au vieles abverlangt, das 2020. Bsunders gäge Ende Johr isches mer schwär g’falle, mer äs bitzeli Liechtigkeit & Unbeschwärtheit z’erhalte; obwohl das für mis g’stalterische Schaffe so wichtig wär!
Will i sälber weniger Shootings gha han, bini ab & zue (also täglich, wenn mer denn scho ehrlich sind) uf insta & pinterest umedümplet und han gluegt, was anderi so tüend. Und das macht nöd immer nur Guets mit mir. Statt mich inspirierä z’loh, fang i öpedie ah, mi mit andernä z’vergliiche, di eigenä Bilder z’hinderfrogä… . Und denn chunt wieder dä Perfektionist füre, wo ganz still und lieslig frogt: Bini würkli guet gnueg um mit andernä mitz’haltä?

Drum gönn i mer im neuä Johr ä kreativi Kuur. I bi nämli däbi, mer äs paar freii Shootings z’organisierä! Frei, das heisst unentgeldlich… aber däfür meistens au mit ganz viel Spass verbunde. I chan mi kreativ ustobe, fühl mi frei, Ideä us’probierä und eifach losz’leggä! Äs Wohlfühlprogramm für d’Seel! So wie ä warmi Duschi nocheme Tag ä dä Chälti, oder frisch gwäschni Bettwösch… nur besser!

Und will mi das sooo glücklich macht, möchti eis vo denä freiä Shootings verschenkä:
Kennäd ehr öper, wo im letschtä Johr ime system-relevante Bruef hät müesä Überstunde leistä, wo under dä schwärste Bedingige versuecht hät, sis Gschäft über Wasser z’halte, ohni sich vo langjöhrige Mitarbeiter müesä z’trennä, wo um liebi Ahghörigi hät müesä bange, oder gsundheitlich sälber betroffe gsi isch… ?

Mälded eui bi mir und schilderäd mir, warum ehr genau die liebä Menschä mit neuä Erinnerigä, ane hoffentlich besseri Zuekunft möchted beschenkä. Am eifachste goht das über’s Kontaktformular underhalb vom Blog.
I freu mi, zämä mit eui öperem ä Freud z’mache!

Teilnahmebedingige:
*gilt für äs 60 minütigs Portrait-/Paar-/Familieshooting, dürez’füehrä im erstä Halbjohr 2021, durch bildhübsch, judith sonderegger fotografie, i dä nöcherä Umgäbig vo Uzwil/Gossau SG, Teilnahmeschluss bis 08.01.2021

no Comments

Leave a Reply

error: Content is protected !!