Was mir hilft zu mir sälber z’finde

dä Usstieg usem Gedankekarussell

Hüt isch wieder einä vo denä Täg, woni mi ganz mim Business widme dörf! Dä chlii Mah hät ä wunderbari Ziit bi mine Schwiegerelterä (wo er übrigens liebevoll Moomi & Poopi nennt) und ich han hüt Morgä bereits dörfe, d’Bilder vonerä winterliche Zivilhochziit, a liebi Chunde verschickä! Also eigentli wäri jetz parat, für dä Restä, woni mir vorgnoh han… wie zum Bispiel dä Blogartikel!
Aber halt, i mues doh no schnäll öpis recherchierä, ah, ä Sprochnochricht…, wart uf Insta sötti au wiedermol was poste – genau! Öpe so laufts amel. Goht eui das au öpedie so, dasses eui schwär fallt, bi dä Sach z’bliebä & eui nöd vo allem um eui ume ablenkä z’loh?
A däre Stell liebi Grüessli a alli, wo im Homeoffice schaffed…

Wie einigi vo eui wüssed, hani mi im letschtä Johr sehr starch mit dä Persönlichkeitsentwicklig beschäftigt. I han äs 3-monatigs Coaching dörfe absolvierä und nöd nur eimol isches däbi um dä Fokus gange. Wie schafft mer’s sich uf s’Wesentlichi z’konzentrierä? Die 7 Faktore hälfed mir däbi, konzentriert z’bliebä…

– I bruch än ufgruhmte Schriebtisch (joh, i stohne offe zu mim Ornigsfimmel) & äs paar inspirierendi Details um mi ume
– Sich vorus öpis Guets gönne (ä feini Handcreme, än wärmendä Tee, äs Lieblingsoutfit…)
– Wenn i gspüre, dass sich s’Gedankekarussell ahfangt dreiä, machi ä churzi Meditation* (am beschtä gad als ersts)
– Anstatt ä langi Liste vo To-Do’s, setz i mir nur eis Ziel (wenn das gschafft isch, bini umso meh motiviert, di nögsti Sach ahz’goh)
– Wenn gar nüüt anders hilft – ab i d’Natur! (än churze Spaziergang hilft mir, dä Chopf z’lüfte)
– Viel Wasser trinke! (i vergiss das immer!!! …und wunderä mi denn, wieso i Chopfweh han)
– D’Ufgobe zitlich noch dä Produktivität richte (i schaffe am Nomittag meistens besser, plane drum di Chopflastigerä Sache eher für denn ih)

*I han uf Netflix d’Headspace-Serie für mich entdeckt und bin – trotz ahfänglicher Zwiefel – begeisterät! Meditation hät mi nie würkli ahgsproche und i ha sie schlichtweg für überbewertet g’halte. Aber i bin würkli überrascht gsi, dass is innert 10 min schaffe, s’Gedankechaos i mim Chopf losz’loh & mir so än frische Start z’ermögliche. Äs i sch für mich ä Art Reset Button, äs erdet mi wieder, wenn min Geist abdriftet! Wenn ehr Luscht händ, probieräd sälber us. I bin gspannt, was ihr für Erfahrige mached?

I empfindä s’freie (uftragsunabhängige) & kreative Schaffe als Selbständigi als sehr usefordernd und han mer lang klari Strukture g’wünscht. Aber Inspiration chunt meistens nöd uf Chnopfdruck und s’Risiko bim Stöberä noch neuä Ideä, abglenkt z’wärde, isch gross. I wärd mi drum i dem Johr au intensiv mitem Thema Monats-/Johres-Planig usenand setzä. I mache kei herkömmlichi Businessplanig, sondern ä Art Wägwieser. Er zeigt mis Johresziel uf, aber au im konkreterä, was für Schritt dä Reihä noh nötig sind, um das Ziel z’erreichä. I bin gspannt, wie mini Art, Themä in Ahgriff z’neh, sich dur das wird veränderä?

no Comments

Leave a Reply

error: Content is protected !!