mini liebi für authentischi bilder…
…oder, wie Erinnerige entstönd, wo eui no lang viel Freud mached
Vor dä Kamera z’stoh, isch für di meistä ungewohnt – äs brucht Vertraue & mer mues äs bitz Kontrolle chöne abgeh. Drum isches mer uhsinnig wichtig, dass ehr eui mit mir wohlfühled. Das chani nur erreichä, wenn ich eui ines Gspröch verwickle, eui ufmerksam zuelose, eui Ziit lohne zum ahcho & euri ahfänglich Ufregig abschüttle.
D’Kamera söll bim Shooting nie im Vordergrund stoh, sie isch nur äs Mittel zum Zweck. Us dem Grund versuechi, ihre au nur soviel Beachtig wie nötig z’schenkä. Ehr müend während äm Shooting nöd i mini Linse luegä.
Viel schöner isches, wenn ehr änand ahstrahled, eui unterhalted, dä Alltag loslönd mitenand lached, zämä d’Umgäbig beguetached, eui öpis is Ohr flüsteräd, äm anderä än Kuss uf d’Stirn gänd, äs Tänzli woged, Stei is Wasser wärfed, kuscheläd… das sind doch die bsunderä Momentufnahme, wo mer möchted für immer bewahre! I will nöd, dass ehr i zäh Johr zunenand säged: Lueg mol, wie schön mer doh alli i d’Kamera gluegt händ! Sondern, dass ehr erinneräd, wie ehr eui gfühlt händ, was eui i dem Augeblick verbunde hät.
Doh äs paar chlini, aber feini Hälferli für eui:
Was leggäd mer blos ah?
I empfehl eui uf jedä Fall euri Outfits ufenand abz’stimme: Ton-in-Ton chunt bsunders guet, will’s eui optisch scho verbindet! Achted däbi druf, knalligi & uffälligi Muster eher z’vermeidä, oder dezent ihz’setzä (Fingernägel, Lippestift…) – sie ziehnd z’viel Ufmerksamkeit vom Wesentliche ab. Joh, und di passendä Schueh ghöred au zume guetä Outfit. I fotografierä zwor gärn us dä Nöchi, aber äs paar Bilder, wo euri Füess mit druf sind, git’s natürli au immer. =) Ergänzendi Accesoires wie än Huet, ä cooli Sunnäbrille, ä Uhr, Schmuck, oder… chönd euiä Look abrunde.
Was isch di ideali Ziit für äs Shooting?
Mer sind privilegiert, dass mer i üserne Breitägrad vier Johresziite dörfed erläbe & jedi vo ihne hät ihri bsunderä Schönheitä! Äs git kei schlechti Saison für schöni Bilder. Mer müend üs eifach dä Gegäbeheitä ahpasse & üs villicht ä Schlechtwetter-Variante überlegä. Vom Liecht her eignäd sich dä früeni Vormittag / Obig am beschtä, will denn d’Sunne eher tüüf stoht, und weicheri Kontrast zeichnet (kei Pandabär-Schatte uf dä Auge).
Häsch du äs Studio?
Nei, i fotografierä eui am Liebstä i dä freiä Natur! I bin dävo überzügt, dass es mir & eui doh liechter fallt, losz’loh, üs freier z’fühle, üs kennäz’lärne & ganz bi üs sälber z’sie. Wenn d’Wätterfee am Shootingtag nöd mag mitspielä, finded mer zämä bestimmt ä gueti trocheni/warmi Alternative.
Hilfsch du üs mit dä Pose?
… joh & nei! I büt eui natürlich Hilfestellig, versuech eui äs bitzeli in Bewegig z’halte und tue eui während äm ganze Shooting z’unterstütze. Äs isch mer aber sehr wichtig, dass ehr chönd eui sälber bliebä und eui nöd müend “für mich” in irgendwelchi seltsame Pose verränke.
Drum gib ich statt konkretä Posingtipps eigentli lieber wogi Ahwiesigä, wie zum Bispiel: “Nimm sie in Arm & züch sie fescht a dich”. Wie ehr das umsetzäd, bliebt eui überloh. I druck eifach im richtige Moment uf dä Uslöser & i freu mi immer wie veruckt , wenn mer zämä ase schöni Bilder erschaffed!
Was hilft üs usserdem?
Mer mached die Bilder nur für eui, nöd für mich, oder irgendwer anders – äs sind euri Erinnerigä! Dä Sinn hinder Fotografie isch, dass sie’s schafft, eui inen Moment zruggz’bringä, eui äs Gfühl nomol durläbe z’loh & euri Gschicht für die, wo noch eui chömäd, sichtbar z’mached. Lenkäd euri Ufmerksamkeit meh uf eues Innere, uf das was ehr empfinded. Das wo um eui ume isch, dörfed ehr mir überloh. Äs goht nur drum ä chliini Usziit mitenand z’gnüsse!