Schwangerschaft – zu dem grosse Wort, git’s no ä grösseri Mengi a Gfühl & Meinigä doh dusse.
Ganz egal, ob du gueti, oder au schwierigeri Erfahrige mit dinerä Schwangerschaft verbindisch – d’Tatsach, dass i dim Körper än chliine Mensch anewachse dörf, isch und bliebt äs grosses Wunder! Äs Wunder, wo’s verdient in Erinnerig z’bliebä.

So vieli prägendi Augeblick
Di strampelndä Füess im Buuch wohrneh, dä Herzschlag vo dim Baby s’erschte mol g’höre & g’spannt si, uf das chliine Gschöpf, wo s’Läbe bald mit ganz viel Farb füllt – und joh s’zuegegebenermasse gad au mol churz uf dä Chopf stellä wird.
All die Emotione verbindi mit mine eigenä Schwangerschafts-Bilder und i bin uhsinnig dankbar, dass i mi denn entschiedä han, sie ihzfange & festz’halte.
Wie sich das ahgfühlt hät, goht im Alltag (und mit dä neuä Ufgobe) so schnäll vergässe.

Stolzi grosse Gschwüsterti
Natürli isches au immer ä schöni Glägeheit, mit äm grosse Schwösterli / Brüederli chli Vorfreud uf das neue Familiemitglied z’zelebrierä. Sie wärded bald mit eui zämä für das chliine Menschli doh si, sich ihm verbunde fühle und villicht au stolz si, ihm bim Lärne & Entdeckä z’hälfe. 
Das chan sie däbie understütze, i ihri neui Rolle z’finde.

Dörfi au älleigä zu dir cho?
Au Bilder nur vo dir & dim Babybuuch, chönd ä schöni Erinnerig & äs Gschenk a dich sälber si! Villicht sind sie eimolig, villicht nöd – aber i jedem Fall sind sie bedütigsvoll. Äs isch din Körper, wo zu grossartigem i dä Lag isch & äs isch dini Entscheidig, ihn z’fiire!

Wenn isch dä richtigi Ziitpunkt?
Ich empfehlä äs Babybuuch-Shooting ab dä 32-ste bis spötestens zu dä 36-ste Schwangerschaftswuchä. Wenn ehr eui ä stilvolli Reportage im Tagesliecht-Studio wünsched, isch das au relativ churzfristig möglich. Für Outdoor-Shootings reservieri mir vorgängig gärn zwei Termin, falls s’Wätter nöd mitspielt.

Äs Babybuuch-Shooting mit mir duret ca. 40min, chostet CHF 330.– und ergit für eui ca. 25 usgwählti und nohbearbeiteti Bilder. Innert einerä Wuchä schicki dir än Link zunerä Online-Galerie mit dine Bilder, wo du sie chasch in voller Druckuflösig abelade.

Fahrspesen bis 30km sind inklusive