a

bildhübsch empfehlige

zuckerkuss

empfehlig für hochziitspatisserie

Süessi Ideä und Patiseriä i jederä Form und Farb, das isch d’Wält vo dä Patricia Bellia-Strässle. Sie isch usbildeti Bäcker-Konditorin und hät sich i dä letschtä Johr mit zuckerkuss ihren Traum vo dä Selbständigkeit erfüllt. Mit viel Kreativität und Fliess hät sie ihres Gschäft zum florierä brocht. In ihrem Altelier in  Frauenfeld setzt sie all euri Wünsch mit viel Gschick um: Mehrstöckigi Hochziitstorte, originelli Themetorte, feini Cupcakes, hübschi Cakepops, vielsitigi Candybuffets und vieli wiiteri Läckereiä… entstönd so in sorgfältiger Handarbeit. I han d’Patricia als jungi, unkomplizierti, spontani, offeni und kompetenti Persönlichkeit dörfe kennälärne. Danke, dass du mir äs bitzli meh über dini Liedäschaft verzellt häsch.

Meh über zuckerkuss erfahred ehr under: www.zuckerkuss.ch

brautmode livia

empfehlig für bruutmode

Vor äs paar Wuchä hani mi mit dä sympathische Lea Landgraf in ihrem Bruutmode Gschäft troffe. Sie hät mi sehr herzlich empfange und mir än Kafi und äs Stuck Schoggitorte ahbote… eifach wunderbar. I han d’Lea a dä Hochziitsmäss im Schloss Wartesee kennäglärnt. Äs isch schön, dass sie als jungi, dynamischi Frau mit Stil dä Schritt i d’Sälbständikeit wogt, än Lade übernimmt und frische Wind dri bringt. Zauberhafti Spitze-Boleros, eleganti Kleider (äs mues nöd immer wiis si… liebi Dame), zarti Schleier, filigrane Hoorschmuck… doh würd sälbst i als verhüroteti Frau, liebend gärn nomol än “Traum in wiis” ussuechä. Dä Ustusch mit dä Lea isch würkli sehr ufschlussriich gsi – danke für dini Offeheit und dass du dir Ziit für mi gnoh häsch.

Luegäd doch mol bi ihre verbi: www.brautmodelivia.ch

nisago - you made it.

empfehlig für mass-gschniedereti herrenahzüg

Herrenanzüg noch Mass, mit vielä persönliche Details ahz’fertigä – das isch dä Grundgedanke gsi, wo dä Stefan Niederer und sin Gschäftspartner, dä Sandro Agosti däzue bewoge händ, nisago z’gründe. I han dä Stefan vor äs paar Wuchä i ihrem gschmackvoll ihgrichtetä Lade in St. Gallen bsuecht. Er hät mer viel Interessants über hochwertigi Scabal-Stöff, ä chici, farblich abgstimmti Gürtel-Kollektion, eleganti Innefueter, sowie di für nisago eigenä Chragestickereie (mit Name und Hochziitsdatum) verzellt. Die massgfertigtä Ahzüg werded in Dütschland hergstellt. I bi begeisterät, dass sich au immermeh Brütigam sich für Ihren Grosse Tag im Läbe än bsunderä Ahzug schniederä lönd!
Liebi Hochziitspaar, bi nisago werded ehr zuvorkommend und sympathisch empfange, fachmännisch und stilgerecht berohte. Und dä Stefan hät mer sogar äs paar Guetschii für eui mitgeh…

Bi Interesse mälded eui eifach bi mir, oder gönd uf: www.nisago.ch

dj piccolo

musig vom feinschtä

Die Wuchä isch dä Pascal Dönni, einigä besser bekannt als dj piccolo, bi mir uf än Kafi verbi cho. Mer händ üs im Summer binerä Hochziit, wo mer beidi als Dienstleister buecht gsi sind kennäglärnt und i han grad denkt, das isch än Mensch, woni eui gärn möcht vorstellä. Er isch stolze Familievater vo zwei chline Maitle, läbt zämä mit ihne, sinerä Frau & einigä Tierli ufemä restauriertä Buurehof doh i dä Region und hät sich vor einiger Ziit als DJ selbständig gmacht. Musig begleität ihn scho sis ganze Läbe und er hät vor churzem sis 20-jöhrige Jubiläum hinder dä Platteteller gfiiret. Er leit hauptsächlich bi Hochziite, Firme-Events uf. Wie mir isch au ihm dä persönlich Kontakt mit sine Chunde wichtig – er trifft sie drum gärn füres Vorgspröch. Dä Pascal hät mer verzellt, dass d’Wünsch und Vorstelligä vo sine Chunde, d’Atmosphäre oder d’Stimmig vo dä Gsellschaft und au regionali Aspekt chönd än Ihfluss uf sini Musiguswahl ha. Er hät mit sim Hindergrund (sinerä Arbet als Animateur und spöter als Sozialpädagog) äs uhsinnigs Fiingfühl entwicklet und schafft so, uf ahgnehmi, humorvolli Art uf d’Menschä ihz’goh. Wenn ehr für euies Hochziit än DJ suechäd, chani ihn eui wärmstens empfehlä.

Ehr finded ihn uf sinerä Homepage: https://djpiccolo.ch/

tamara's caravanbar

rundet au euies Fäscht perfekt ab

D’Tamara und ich kennäd üs scho länger, will mer mol mitenand i dä Papeterie gschaffet händ. Üseri Wäg händ sich i dä letschtä Johr i underschielichi Richtige entwicklet. Umso schöner isches gsi, sie letscht Wuchä noch lagem wiedermol z’träffe und über ihres Herzensprojekt, d’Caravanbar z’pläuderlä. Sie hät mi zumenä «Aprikose-Kuss» – äme eigens kreiertä Drink – ihglade und hät mer chli verzellt, wie’s ihre so ergange isch & was sie ahtriebt. Sit zwei Johr isch di usbildeti Betriebsfüehrerin Gastronomie mit ihrem chliine, fiine zunerä Bar usbaute Wohnwägeli a private Fäschter, Hochziite, Firmeevent underwägs. D’Idee für di hübschi Caravanbar hät d’Tamara uf ihrne Reisä rund um d’Wält gha. Mit ihrerä offenä und herzliche Art und mit dä Erfahrig, wo sie bim Füehrä vonerä Bar mitte in St. Gallen gsammlet hät, isch sie ä uhsinnig ahgnehmi Gaschtgeberin. Villicht beriicherät sie demnächst au euien Hochziitsapéro, oder ehr träffed Sie bald ufemä Event, oder a dä Hochziitsmäss, wo sie das Johr dörf usstellä.

Wenn ehr sie möchted kennälärne, chönd ehr gärn über ihri Homepage: http://tamarascaravanbar.mystrikingly.com/ mit ihre Kontakt ufneh.

Falls du uf dä Suechi noch meh Inspiration bisch, chani dir mini Pinterest-Siite sehr empfehlä. Uf eim Pinboard dreit sich alles um’s Thema Hochziite…

Oder nimm via Social Media mit mir Kontakt uf…

error: Content is protected !!