bildhübsch familie & fründe

Erinnerigä z'ha a bsunderi Moment mit sine Lieblingmenschä, das isch i üserä schnällläbige Ziit so unendlich kostbar.

Wie entstönd di für eui so wertvolle Erinnerigä?

hälfed mer, euri ganz persönlichi Gschicht verzellä. Ich möcht ihfange, was eui als Familie verbindet, oder euri Fründschaft so grossartig macht!

Wünsched ehr eui natürlichi, ungstellti Bilder, wo eui so zeigäd wie ehr mitenand sind? Ehr liebäds Ziit mitenand i dä Bärge z’verbringe & planed scho di nögsti Tour, höckled am Obig ime gmüetliche Kafi und pläuderläd über Gott & die Wält, stöberäd gärn mitenand dur Brockis und Secondhand-Lädeli, git’s für eui nüüt Schöners, als ame laue Summerobig zämä am See z’höckle und ä Gelati z’gnüsse, chönd ehr mitenand Lache, bis eui dä Buuch weh tuet, flanieräd ehr uhsinnig gärn dur d’Gässli vo dä Altstadt & lönd eui triebä,… . Mer isches wichtig ihz’fange, was eui verbindet & euri gmeinsami Ziit so wertvoll macht.

D’Atmosphäre spielt bime Shooting ä sehr wichtigi Rolle. Ich persönlich gange sehr gärn i di frei Natur go fotografierä, will sie öpis bi üs uslöst, wo üs erdet, entspannt & ablenkt. Überlegäd eui, ob ihr äs Lieblingsplätzli händ, wo villicht für eui ä bsunderi Bedütig hät, wo ehr eui wohl fühled. Aber au s’Liecht spielt ä entscheidendi Rolle; di beschti Ziit zum Fotografierä isch i dä früehnä Morgä-, oder Obigstunde. Denn stoht d’Sunne tüüf am Himmel und wirft äs wunderbar weichs, schmeichelhafts Liecht. Starchi Schatte und Kontrast wärded so vermiedä.
I bsitze äs tragbars Musigböxli, woni gärn chan mitbringe, falls ehr bim Shooting euri Lieblingssongs möchted lose. Bi dä Umsetzig vome Familie- & Fründinne-Shooting sind dä Ideä (fascht) kei Grenze gsetzt. I han scho mit Fründinne ufemä Buurehof in pinke Gummistiefel gfötelät, ä Familie bim Pick-Nick begleitet, oder äs as Härz gwachses Huustier, oder di heiss-gliebti Vespa däbi gha…

Ahgebot: Familie / Fründschafts-Shooting

Äs Familie- oder Fründschafts-Shooting (bis 5Persone) mit mir duret ca. 60min, chostet CHF 330.– und ergit für eui ca. 50 usgwählti und nohbearbeiteti Bilder. Innert einerä Wuchä schicki dir än Link zunerä Online-Galerie mit dine Bilder, wo du sie chasch in voller Druckuflösig abelade.

Natürli fotografieri au sehr gärn grösseri Gruppe. Für das nimm i mir jewiels gärn chli meh Ziit, was sich schlussendlich au uf d’Ahzahl vo dä Bilder uswirkt und äs bitzli meh chostet. I freu mi uf euri Ahfrog und mache eui gärn äs uf eui zuegschnittes Ahgebot.

Fahrspesen bis 30km sind inklusive

Buechäd euers Shooting

Impressione

Ä Uswahl vo mine Lieblings-Bilder us Familie- & Fründschafts-Shootings finded Ihr doh...

error: Content is protected !!