Wünsched ehr eui natürlichi, ungstellti Bilder, wo eui so zeigäd wie ehr mitenand sind? 
Ehr liebäds Ziit mitenand i dä Bärge z’verbringe, ehr mached gärn äs Füürli & brötled zämä Marshmallows, oder ehr baued gärn «Steimannli» a dä Thur, höckled ame laue Summerobig zämä am See & gönned eui ä Gelati, flanieräd ehr gärn dur d’Gässli vo dä Altstadt & lönd eui triebä… . 
Mer isches wichtig ihz’fange, was eui verbindet & euri gmeinsami Ziit so wertvoll macht.

Wo & wenn träffed mer üs für äs Shooting?
I gange sehr gärn i di frei Natur go fotografierä, will sie i üs allne öpis uslöst, wo üs ärdet, entspannt & ablenkt. Inzwüsche kenni äs paar hübschi Plätzli, aber wenn ihr äs Lieblingsplätzli händ, wo für eui ä bsunderi Bedütig hät, los i mi natürli sehr gärn druf ih!
Aber au s’Liecht spielt ä entscheidendi Rolle; di beschti Ziit zum Fotografierä isch i dä früehnä Morgä-, oder Obigstunde. Denn stoht d’Sunne tüüf am Himmel und wirft äs wunderbar weichs, schmeichelhafts Liecht.


Mini Chind stönd nöd gärn vor dä Kamera
Bsunders wenn chliini Chind bim Shooting däbie sind, achti druf, dass mer üs au ihrem Rhytmus chönd ahpasse. I hol sie ab, versuech mit ihne is G’spröch z’cho, sie villicht ines Spiel z’verwickle. Bringed ihri Lieblings-Büechli, äs Kuscheltier, Seifäblöterli, än chliine Snack oder au «Bestächigsmaterial» a s’Shooting mit. Alles was hilft, isch erlaubt! Bitte säged ihne nöd, tüend denn schön i d’Kamera lächle – das macht ihne & eui nur unnötige Druck!
Und wenn dä Papa au nöd gärn uf dä Bilder isch – dä mues eifach! Familie-Erinnerigä zämä sammle, isch Teil vo sim Job-Beschrieb…


Was sölli nume ahleggä?
Beträffend Outfit-Uswahl: Ehr sölled eui i dä Kleider schön fühle, eui aber nöd verkleidä. Verzichted uf grossi Logo-Drück, uffälligi Muster und wähled Farbe, wo zuenand passed (ich persönlich liebä, zrugghaltendi, helli, natürlichi Farbtön). Zum’s spannender g’stalte, oder wenn’s chli chüeler isch, chönd ehr au mehreri Kleidigsstück schichte & zum Bispiel ä cools Lederjäckli, oder än Strickcardigan drüber zieh. Achted au druf, dass euri Schueh zum restliche Outfit passed.