a

bildhübsch inspiratione

getting-ready

warum d'vorbereitige äs wert sind ihgfange z'wärde...

S’Getting-Ready isch d’Ziit, wo sich Bruut und Brütigam uf dä Tag vorbereitäd. I finds immer wunderschön, wenn i die bsunderi Stimmig voller Erwartige, Ufregig und Vorfreud uf dä Tag wo sie so lang drufanegfieberät händ, für äs Paar dörf ihfange. Äs isch än uhsinnig stimmige Ihstieg in Hochziitstag, wo än Zauber a sich hät. Ob die Vorbereitigä diheimä, im Eltärehuus, oder imenä elegante Hotelzimmer stattfinded, das entscheidäd ihr. Ideal isch än hellä Ruhm mit viel Tagesliecht. Überlegäd eui, wär ehr möchted däbi ha… euri Trauzüge, äs Mami, oder di beschti Fründin / dä beschti Fründ? Sicher wird äs bitzeli Nervosität bi dir/eui ufcho und äs isch schön, öper a sinerä Siite z’ha, wo dir/eui bistoht… und sich mit & für eui freut!
Für d’Bruutvorbereitige rechni jewiels ca. 1 Stund Ziit ih; bim Brütigam langet i dä Regel 30min. Däbi entstönd bildhübschi Detailbilder vom Bruutstruss, vo dä Ehering, vom Bruutkleid & vom Ahzug, vo Accesoires wie ä Flüge, ä Tascheuhr, Schueh & Schmuck, oder au vome Parfumflacon. Aber natürli au vo dä letschtä Pinselstrich vo dä Visagistin, vo eui bim erneutä dureläse vo dä sälber verfasste Eheverspräche, vom Ihkleidä vo dir/eui… & zu gueter letscht, bim Ahstosse uf euä Hochziitstag! Yeeeey…

first-look

einä vo dä schönste Moment vo euiem grosse Tag...

Einä vo mine persönliche Lieblingsmoment vo jedäre Hochziit, isch dä First-Look: Dä Augäblick, wo sich Bruut und Brütigam zum erstä mol gsehnd. Än Moment, wo eifach magisch isch, won ehr eui solang vorgstellt händ, än Moment, wo’s schafft eui Freudäträne i d’Auge z’triebä, einä, wo eui beidä ganz älleigä ghört und unvergässlich bliebä wird. Binerä traditionelle, chirchliche Trauig isches Bruch, dass dä Bruutvater sie zum Altar füehrt und denn an Brütigam übergit. Meistens bliebt aber bi dem Ablauf leider chum gnueg Ziit und Platz für euri Emotione… . Drum empehlä ich mine Hochziits-Päärli dä First-Look und s’Paarshooting vor dä Trauig z’mache. Äs spricht vieles dafür: Ehr sind no ganz “frisch”, händ kei Gäscht im Hinderchopf, wo uf eui warted & chönd die Ziit eifach mitenand gnüsse und so gstalte, wie ehr’s eui wünsched. Wenn ehr öpe ei Stund für s’Paarshooting ihplaned (+allfälligi Ahfahrts-Wäg), händ mer gnueg Ziit, damit i eui au immer wieder chliini Päuseli chan geh, wo ehr ganz für eui dörfed si.
Wenn euien Ziitplan recht straff isch und ehr kei Stund chönd erübrige, git’s au immer d’Möglichkeit, dassi eui am Obig, bi Sunneundergang nomol für ca. 15 min tue entfüehrä und mer im Obigliecht äs paar romantischi Bilder mit eui beidä ihfanged. Euri Gäscht wärded eui für äs Viertelstündli chöne entbehrä und für eui entstönd äs paar wunderschöni Erinnerigä a euien grosse Tag.
Händ ehr än bsunderä Wunsch, wie äs paar Hochziitsbilder vo eui uf dä Schwägalp, oder am Caumasee… , oder hät s’Wätter a euiem grosse Tag nöd so richtig mitgspielt? Das wär ä wunderbari Glägeheit für äs After-Wedding-Shooting! Mer träffed üs ca. 1-2 Wuchä noch euiem Hochziit nomol a euiem Lieblingsort und fanged mitenand äs paar bildhübschi, entspannti, losglösti Moment (ganz ohni Ziitdruck) für eui ih.

Verzelläd mer vo euinä Vorstelligä und Wünsch? I bi gspannt, uf d’Gschichte wo dähinder steckäd…

hochziits-album

warum bsunderi Moment i euiem Läbe än bsunderä Rahme verdienäd...

Üseri Wält wird immer schnell-läbiger… umso wichtiger isches, Augeblick, wo eim berüehrt händ und wo mer sich no ganz lang möchti dra erinnerä, z’bewahre – und das imenä Rahme, wo ihne gerecht wird. Bilder vo euiem grosse Tag, verdienäds für immer z’bliebä. Däbi isches nöd wichtig, möglichst vieli Bilder imenä Album z’sammle, sondern sich dafür z’entscheidä,

welli d’Gschicht vo dem für eui so bsunderä Tag verzelläd,
welli eui i die Moment zrugg versetzed und eui d’Gfühl, wo ehr doh gha händ, wieder zrugg bringäd,
welli, ehr euinä Chind und villicht irgendwenn euinä Grosschind möchted zeigä…

Drum isches mer äs Ahliegä, dass mini Chunde, ca. 3/4 vo dä im Album enthaltene Bilder sälber ussuechäd. Zum’s Album abz’runde wärdi ergänzend no einigi wiiteri passendi Bilder uswähle und in Entwurf ihfüegä. Sälbstverständlich erhalted ehr vom fertigä Entwurf äs Guet-zum-Druck, wo ehr dörfed Ahmerkige däzue mache.

Joh, äs hochwertigs Album hät sin Priis. Und noch allne finanziellä und ziitlichä Ufwänd, wo mer ines Hochziit steckt, hät mer villicht kei übrigs Budget meh, zum sich das leistä. Aber äs isch i jedem Fall ä Investition, wo sich lohnt… und me chan sich äs Album au vo dä Gäscht uf d’Hochziit schenkä loh.

Mit Kala-Albums hani än Ahbüter gfunde, wo wunderschöni und sehr hochwertigi Fine-Art-Fotobüecher herstellt. Bi dä Produktion spielt d’Nochhaltigkeit vo dä Rohstoff ä grossi Rolle. Vieli Arbeitsschritt werdäd no mit viel Passion für’s Handwerk manuell usgfüehrt und das merkt mer am Endprodukt ah.
Falls ich euies Interesse g’weckt han, chani eui sehr gärn ä detaillierti Offertä zuecho loh.

Falls du uf dä Suechi noch meh Inspiration bisch, chani dir mini Pinterest-Siite sehr empfehlä. Uf eim Pinboard dreit sich alles um’s Thema Hochziite…

Oder nimm via Social Media mit mir Kontakt uf…

error: Content is protected !!