Tastendi Händli, äs flüchtigs Engelslächle, oder äs härzhafts Gähne.. di etstä Bilder vomene Neugeborene ihz’fange, hät für mich än ganz än bsundere Zauber a sich.
Äs sind Erinnerigä ane Ziit voller Stuhne, ä Ziit vo Fürsorg und Zueneigig, ä Ziit voll vo Geborgeheit… und joh, äs chan au sehr ä strengi Ziit si. Für äs Neugeborene-Shooting mit mir bliebäd eui drum zwei Möglichkeitä: Ehr bsuechäd mich eifach i mim chliine, aber fiine Tagesliecht-Studio in Niederuzwil. Dött händ mer alles nötige für’s Shooting vor Ort & ehr müend diheime nüüt umstellä. Oder – falls eui das lieber isch – chani eui au im eigenä Diheime portraitierä. Denn suechäd mer g’meinsam äs g’eignets Plätzli i dä Wohnig / im Huus mit möglichst viel Tagesliecht.

Wenn isch dä Richtige Ziitpunkt für äs Neugeborene-Shooting?
Di Chliine pfuused i dä erstä zwei bis drü Wuchä viel und lönd sich i däre Ziit guet vo mir positionierä und kuschelig ihbettä. Natürlich achte i sehr druf, dass sich eui chliine Schätz wohlfühled. Sie sölled sich frei dörfe bewegä. I halte nüüt vo künstletä Pose. Viel wichtiger sind di gfühlvolle Moment zwüsche eui & euinä chliine Schätz. I han ä grossi Uswahl a Tüecher & Deckä, aber au äs paar zauberhafti Bodys, Hösli & Strampler zum uslehnä sind vorhande.

Wenn sölli Kontakt ufneh, wenn mir möchted äs Shooting bi dir buechä?
Mälded eui doch gärn äs paar Wuchä vorem errechnetä Geburtstermin bi mir, damit mer euri Wünsch und Vorstelligä chönd bespräche… und villicht scho mol än ungefähre Termin-Rahme verihbare.

Wie lang duret äs Neugeborene-Shooting?
Für äs Neugeborene-Shooting nimm i mir gärn chli meh Ziit (ca. 120min). Äs chan guet sie, dass s’Mami zwüschedüre mues Stille, oder ä volli Windle druf wartet, vom Papi g’wechslät z’wärde.

Dörfed dä grossi Brüeder / s’grosse Schwösterli au däbie si?
Uf jedä Fall… äs entstönd mit dä Gschwüstertä immer uh härzigi Bilder! Am Beschtä mached mer die gad am Ahfang. Äs isch aber nöd nötig/empfehlenswärt, dass di ältere Gschwüstertä während äm ganze Shooting im Ruhm sind. Wärded sie unruhig, übertreit sich schnäll uf’s Chliine. Überlegäd eu doch vorgängig, wie sie sich denn chönd zrugg zieh und guet beschäftige. I mim Studio stoht für das än chliine Spieleggä bereit.