bildhübsch portraits

Bilder vo euiem grosse Tag... - wo einzigartig und authentisch sind - wo euri Gfühl fürenand wiederspiegled - mit dä für eui so bsunderä Moment - wo's schaffed euri Emotione au i 10 Johr no zrugg z'bringä - wo für immer unvergässlich bliebäd

Impressionen

Ä Uswahl vo mine Bilder finded Ihr doh...

Wie entstönd natürlichi Bilder?

du bisch bildhübsch… genauso wie du bisch! Äs bruucht Muet und Vertraue, sich z'öffne und ganz sich sälber z'sie - aber äs lohnt sich.

Natürlichi, ungstellti Bilder, wo eui so zeigäd wie ehr sind, wo Priis gänd was euri Schönheit usmacht. Das müend nöd immer di klassische Schönheitsideal si, wo üs d’Mediä wönd vorgauklä. Am Schönste sind ehr denn, wenn ehr eui wohlfühled, nöd müend verstellä & chönd losloh. I weiss, das isch meistens eifacher gseit als gmacht. Vor dä Kamera z’stoh, chan villicht scho chli ihschüchterä und me will sich jo vo sinerä beschtä Siite zeigä… . D’Kamera isch aber schlussendlich nur Mittel zum Zweck – sie macht nur sehr bedingt us, öb bimenä Shooting gueti, authentischi  Bilder entstönd. Was viel meh usmacht isch s’Vertraue in Fotograf / i d’Fotografin und öb er/sie mit eui chan ä Verbindig ufbaue. I han mol imenä Artikel g’läse, dass jedes ehrlichi Portrait äs Gschenk vom Portraitiertä an Betrachter isch. Will er älei entscheidät, was er vo sich will zeigä.

D’Atmosphäre spielt bime Shooting au ä sehr wichtigi Rolle. I gange eigentlich meistens i di frei Natur go fotografierä, will sie öpis bi üs uslöst, wo üs entspannt & ablenkt. Di beschti Ziit zum Fotografierä isch i dä früehnä Morgä-, oder Obigstunde. Denn stoht d’Sunne tüüf am Himmel und wirft äs wunderbar weichs, schmeichelhafts Liecht. Starchi Schatte und Kontrast wärded so vermiedä. I han au äs Musigböxli, woni gärn chan mitbringe, falls du bim Shooting gärn möchtisch Musig lose. Überleg dir, ob du äs Lieblingsplätzli häsch, wo für dich ä Bedütig hät, wo du dich wohl fühlsch. I han au scho mit erä Familie äs chliises Pick-Nick inszeniert, oder äs as Härz gwachses Huustier, oder di heiss-gliebti Vespa bim Shooting däbi gha…

Übrigens: Eis vo mine Lieblingsbilder vo mir sälber isch vor acht Johr in Neuseeland bimenä Strandspaziergang entstande… i bin barfuess und mit Wind i dä Hoor dur d’Wälle gsprunge und han zu mim Schatz i d’Kamera g’lachet. Das Bild isch alles andere als perfekt, aber jedesmol wenn ich’s betrachte, fühl i mi i dä Moment zruggversetzt & gspühr nomol äs bitzli vo däre Freiheit noh…

Ahgebot: Portrait-Shooting

Äs Portrait-Shooting mit mir duret ca. 60min, chostet CHF 330.– und ergit für eui ca. 50 usgwählti und nohbearbeiteti Bilder. Innert einerä Wuchä schicki dir än Link zunerä Online-Galerie mit dine Bilder, wo du sie chasch in voller Druckuflösig abelade.

Fahrspesen bis 30km sind inklusive