bildhübsch päärli

Bilder nur für eui - wo eui zeigäd, wie ehr mitenand lached und dä Moment gnüssed - wo ungstellt und natürlich wirked - voller Gfühl und Zueneigig - wo euri gmeinsami Gschicht verzelläd

Ehr zwei, so wien' ehr sind...

Was bruchts, dass bimenä Fotoshooting natürlichi, gfühlvolli und authentischi Bilder entstönd?

Jedi Liebi isch einzigartig… keis Paar gliicht am anderä! Di einä sind extrovertiert, voller Energie und händs gärn wenn öpis lauft. Anderi gnüssed’s am Suntig Morgä zämä im Bett z’kuschelä, Ziit nur für sich z’ha und goht gmeinsame Hobbies noh.

Mit mine Bilder möchti das, wo euri Beziehig zunenand usmacht, ihfange und für immer festhalte. Natürlich isch das nur möglich, wenn ehr eui mit mir wohlfühled. Drum isches mir wichtig, eui vorgängig churz kennäz’lärne. Das chan än telefonische Kontakt sie, mer chönd üs aber au gärn vorem Shooting irgendwo gmüetlich uf än Kafi träffe. Ganz wie ehr möchted… verzelläd mir eifach äs Bitzli meh über euri gmeinsami Gschicht. Das hilft Vertraue ufz’baue und än entspannte Rahme für’s Shooting z’schaffe.

S’Shooting dörf gärn a euiem Lieblingsplatz stattfinde. Falls ehr kei Ideä doh däzue händ, kenni sälber au äs paar hübschi Plätzli. =)
Di optimalsti Ziit für äs Paar-Shooting isch jewiels ca. 1-2 Stunde noch Sunneufgang, oder vor Sunnäundergang. Wenn d’Sunne tüüf am Himmel stoht und kei harti Schatte wirft, entstönd so richtig schmeichelhaft-romantischi Bilder.

Ahgebot: Paar-Shooting

Äs Paar-Shooting mit mir duret ca. 60-90min, chostet CHF 330.– und ergit für eui ca. 50 usgwählti und nohbearbeiteti Bilder. Innert einerä Wuchä schicki dir än Link zunerä Online-Galerie mit dine Bilder, wo du sie chasch in voller Druckuflösig abelade.

Fahrspesen bis 30km sind inklusive